Forsvarsforum Vestland er etablert
Toralf Rutledal
Styresmakter, næringsliv og akademia vil medverke til meir samarbeid om forsvar og beredskap gjennom Forsvarsforum Vestland.
Av Bergen Næringsråd / Foto: Viggo Holm /Forsvaret
– Målet er å styrkje Vestland si rolle i den nasjonale forsvarssatsinga, spesielt ut frå posisjonen fylket har innan maritim sektor. Vi skal utvikle ein sterk region der nasjonale sikkerheitsinteresser, Sjøforsvaret, totalforsvaret og næringslivet nyttar kvarandre, fortel Toralf Rutledal.
Han er nyutnemnd forsvarskoordinator i Vestland fylkeskommune og nært knytt til Forsvarsforum Vestland, som fylkestinget vedtok å opprette hausten 2025. Dette skjedde mellom anna etter sterke oppmodingar frå Bergen Næringsråd, Maritime Bergen og andre næringslivsaktørar.
«Forsvarsforum Vestland skal gjennom samarbeid medverke til ein auka bruk av sivile, lokale leverandørar til Forsvaret. »
Den nasjonale forsvarssatsinga vil særleg gjere seg gjeldande på Vestlandet. Sjøforsvaret står for det desidert største løftet, med utgangspunkt i marinebasen Haakonsvern. På Vestlandet finn vi også nokre av Noregs største maritime bedrifter og tung kompetanse innan skipsbygging og industri som produserer forsvarsmateriell.
– Forsvarsløftet inneber mellom anna ein kraftig auke i bemanninga i Forsvaret. Vi må i fellesskap sjå til at utdanningstilbod og kompetanse står til rådvelde. Det er også eit sterkt behov for ny arbeidskraft i maritim og teknologisk industri, seier Rutledal.
Forsvarsforum Vestland skal gjennom samarbeid medverke til ein auka bruk av sivile, lokale leverandørar til Forsvaret. Det er også eit høve til å fremje grøn skipsteknologi og å utvikle nye klimavenlege løysingar.
– Difor er det aktuelt å ta med næringsklynger innan berekraftig skipsfart og miljøteknologi inn i nettverket, seier forsvarskoordinatoren.
Forsvarsforum er formelt samansett av fylkesordføraren og ordførarane i dei sju kommunane som er med i tillegg til fylket. Forsvaret, Maritime Bergen og Bergen Næringsråd (på vegne av Næringsalliansen Vestland) blir invitert på møta.
